The Respect Game

Redes sociais para a liberdade de pensamento, a tolerancia e a diversidade

Grazas ao proceso de reflexión realizado antes de pór en marcha o noso pequeno e humilde proxecto, recoñecemos dúas principais concepcións que están presentes no imaxinario colectivo do noso contexto social ao redor das redes sociais. 

A primeira é aquela que considera estes medios dixitais como vías para difundir información e comunicarse entre persoas, pero debido á inxente e incontrolable cantidade de información non veraz contida na rede virtual, só supoñen graves problemáticas respecto da creación dunha sociedade verdadeiramente informada. 

En cambio, o segundo paradigma respecto ás redes sociais é aquel que contempla que existen moitos puntos nos que é necesario incidir no proceso de aprendizaxe do uso destas asertivamente, mais entenden que son unha potente ferramenta pedagóxica que cunha utilización adecuada, facilita a participación e a construción dunha cidadanía equitativa, tolerante e con conciencia crítica.

The Respect Game sitúase claramente na segunda concepción, xa que comprende que, a pesar dos obstáculos que o sistema e a cultural dixital actual na cal protagoniza o "fast" como método de consumo, é necesario construír espazos dixitais programados con metas educativas, que fagan fronte ás necesidades da sociedade actual. 

O noso futuro desexado é a construción dunha sociedade na que, a través da asertiva xestión da información e o coñecemento, se alcance a verdadeira alfabetización dixital, que conduza inevitablemente á liberdade de pensamento e a tolerancia á diversidade e pluralismo.

Por tanto, nesta liña a nosa proposta de actuación é a da creación dun recuncho virtual no cal se divulguen temas de índole social, establecendo vínculos comunicativos baseados no respecto e dinámicas de participación a través da gamificación das redes sociais. Para iso seleccionamos cada quincena unha temática que desenvolveremos a través de publicacións na nosa páxina -3 veces á semana-, combinando post teóricos, noticias contrastadas, debates, testemuños, enquisas, etc. Inspirándonos ademais, noutras experiencias presentes na contorna dixital coma @creando.educacionsocial, @eugeniatenebaum, @desireebelal, @vocessocial, entre outras.

The Respect Game: espazo de divulgación e sensibilización en redes sociais

The Respect Game é un pequeno espazo virtual no cal nós, catro educadoras sociais, facemos un traballo divulgativo e de sensibilización, achegando información de múltiples temáticas de índole social de forma creativa e orixinal. Buscamos que toda a poboación se implique de forma activa, por iso realizamos publicacións con contidos teóricos sinxelos e comprensibles, ademais de levar a cabo múltiples dinámicas que requiran da súa participación e implicación (debates, enquisas, xogos de verdadeiro ou falso, etc.) (ver anexo 1)

Ata o momento, as temáticas abordadas foron as seguintes:

Islamofobia: publicacións que teñen como principal obxetivo proporcionar información sobre a problematica e poñer de manifesto a realidade na que se atopan inmersas moitas personas musulmás e inmigrantes. Ademais de facer unha campaña informativa, tamén realizamos unha pequena dinámica online, en colaboración con Ecos do Sur e con Pluralismo e Convivencia, na que se buscaba que as persoas se puxeran na pel das persoas musulmás, e puideran sentir todo o que elas padecen ao ter que enfrontarse de forma continua a situacións racistas e de  odio.

Comercio Local: iniciativa levada a cabo para promover e apoiar o comercio xusto e de proximidade. Dende The Respect Game publicamos listas que recompilan tendas e pequenos emprendementos, co fin de crear conciencia sobre a importancia de comprar baseándose en criterios de sustentabilidade, e proporcionarlle as persoas destinatarias múltiples opcións sobre comercio xusto e sostible.

Made in Esclavitud (Industria textil): as publicacións que se encadran dentro desta temática están destinadas a crear conciencia sobre todo aquilo que se esconde detrás do mundo da moda e o fast-fashion (explotación, desigualdades sociais, etc.).

Para a realización de todo este traballo empregamos, maioritariamente, recursos tecnolóxicos, dado que se trata dun proxecto online que se centra na sensibilización e o traballo divulgativo a través de redes sociais. As plataformas e aplicacións que máis utilizamos son: canva, instagram e facebook.

Con este proxecto, queremos aportar o noso grao de area na creación de sociedades e comunidades críticas e loitadoras, que busquen construír un mundo máis xusto, equitativo e orgulloso da súa diversidade.