Quen Somos

Manuel Cao

Son Educador Social, Animador Sociocultural, Monitor de Tempo Libre. Tamén son fillo, pai e amigo. Pero sobre todo son persoa, consciente e comprometida coa realización de pequenas accións ou actos que fagan mudar o noso Mundo para Mellor.

Clara de Saa

Xornalista na Radio Galega, presenta "Convivir" desde o anos 2009, un programa de carácter social que conta con 10 premios ao longo desta traxectoria.

Guionista, produtora e realizadora de documentais en Buxo producións: "Aillados" ou " A memoria nos tempos do Wolfram" entre outros. Tamén ten publicados cinco libros de contos para nenos na editorial Kalandraka.

Noa Devesa

O meu nome é Noa e son educadora social. Comecei como voluntaria de Solidariedade Internacional de Galicia alá polo ano 2011. Aínda que a miña andaina comezou da man do comercio xusto, atopei na educación para a cidadanía global unha ferramenta fundamental á hora de traballar a prol do cambio e a través dela fomentar a participación e incidencia política da poboación. "Moita xente miúda, en lugares miúdos, facendo cousas miúdas, pode cambiar o mundo"  E. Galeano 

Alberto Gomez

Nado en outono de 1975 en Vigo e ligado profesionalmente ao sector da decoración, compaxino a vida laboral co voluntariado en Oxfam Intermon dende 2004. Coordinador desta organización dende 2005, son membro da Rede Social Galicia Sur e do Consello Local de Cooperación do Concello de Vigo, ademais de colaborador en diferentes entidades do terceiro sector.

Ana Lopez

O meu nome é Ana López Freitas, son graduada en Educación Social e formo parte de Solidariedade Internacional de Galicia dende o ano 2011. Durante estes anos puiden participar en 8 proxectos de Educación para o Desenvolvemento e a Cidadanía Global, ademais de incontables actividades e iniciativas ao redor da loita contra a pobreza e a desigualdade social.

Ana Lorenzo Vila

Son socióloga e vinculeime ao cooperativismo e á economía social nada máis rematar a carreira, alá pola década dos 90’. Tiven a sorte de ser socia de Cidadanía S. Coop. Galega durante 20 anos, nos que desenvolvín proxectos de participación cidadá coa Administración e con organizacións de base. A investigación e a formación son dous ámbitos que me alimentan. O meu activismo está agora mesmo na economía solidaria e as finanzas éticas. E, por suposto, no Globo.

Yasmin Pineda

Traballadora social nada no Salvador. Responsable da xestión e dirección dunha radio comunitaria no municipio de Tecoluca (Radio Tehuacán), coordinando un equipo de mozos comunicadores, entre o 2012 e o 2014. Neste período desenvolveu programas radiais de enfoque social, de dereitos humanos, de xénero e de medio ambiente e foi testemuña do compromiso que tomou a mocidade no Salvador por buscar espazos afastados da violencia e a delincuencia.

Maribel Valiela

Eu son Maribel Valiela. Nai dunha nena e membro de Solidariedade Internacional de Galicia dende os seus inicios. E igual que "Soli", estou en constante aprendizaxe e maduración.  Profesionalmente dedícome á docencia, gústame pensar que traballo para construír un mundo máis xusto e solidario para todas e para todos.

Ana Lampón

Chámome Ana Lampón, son Educadora Social e formo parte da equipa de Solidariedade Internacional de Galicia, onde desenvolvo a miña labor no eido da Educación para a Cidadanía Global, centrándome nas liñas de investigación e formación. Reflexión, análise e dialóxica, son as miñas verbas predilectas.

Carolina Lodeiro

Politóloga especializada en cooperación ao desenvolvemento e igualdade de xénero. A súa traxectoria profesional comezou no Ecuador, traballando para a AECID, e continuou en Galicia no sector da consultaría social e da cooperación universitaria para o desenvolvemento. Actualmente é socia directora de Wayna Consultora SL.

Maria Caride

Son María Caride, Educadora Social de Solidariedade Internacional de Galicia. Aínda hai moita presenza en min dos sentimentos e maneiras de facer de cando comecei como voluntaria na organización e que conxugo, dende fai xa moitos anos, coa profesionalidade dende o meu rol de técnica na Area de Sensibilización e Educación para a Cidadanía Global. É difícil separar estas dúas facetas, así que convivo con elas no meu día a día.

Jessica Nuñez

Educadora Social. Directora de tempo libre. Experiencia en fomento da participación da mocidade e voluntariado, deseño e execución de campañas de sensibilización e intervención con colectivos en risco de exclusión. Feminista, amante dos animais e da natureza.

Juan de Sola

Xornalista especializado nos Dereitos Humanos, a Solidariedade e a Comunicación para o Desenvolvemento (CpD). Máis de vinte anos en medios nacionais de radio e prensa. Fundador e primeiro presidente da ONG Agareso, Reporteiros Galegos Solidarios. Actualmente, coordina e presenta o programa de radio ‘Contraparte’, en Onda Cero Radio e é asesor internacional da Asociación Mundial de Radios Comunitarias en América Latina.

Carolina Campos

Galega, socióloga de formación con experiencia en recursos humanos e feminista de pensamento. Adoro a música, o deporte, a natureza e a boa compaña.

Como parte de Solidariedade Internacional de Galicia asumín a lóxica da actuación local, o pensamento global e o traballo en rede para acadar a sustentabilidade do mundo diverso que queremos.