O 13 de xuño celebramos o VII Encontro de O Globo!
Un ano máis dende O Globo celebramos o noso encontro anual, un espazo onde entidades, colectivos sociais e centros educativos se reúnen para compartir as súas experiencias, crear sinerxías e pasar unha xornada que combina o aspecto lúdico co reflexivo.
19 maio 2025 | O vindeiro venres 13 de xuño, temos unha cita ineludible no Centro de Estudos Avanzados da USC, onde celebraremos o VII Encontro de O Globo. Este evento converteuse nun referente para persoas e organizacións comprometidas coa transformación social, que atopan aquí un espazo para compartir, aprender e inspirarse mutuamente.
Como cada ano, este encontro será o punto de unión para persoas diversas pero cunha mesma inquietude: traballar pola xustiza social. Un espazo para coñecer referentes e, á súa vez, converterse en referentes para outras persoas.
O encontro xirará ao redor dunha Feira de Microexperiencias de Transformación Social, onde entidades e colectivos amosarán os seus proxectos e iniciativas. Pero tamén haberá lugar para a arte, o humor e a radio, disciplinas que nos permitirán reflexionar de forma conxunta sobre como colaborar para construír un mundo máis xusto.
As novas iniciativas presentadas este ano sumaranse ás xa promovidas, contribuíndo á construción dun Observatorio da Participación e da Cidadanía Global, unha plataforma en constante actualización que xa conta con máis de 90 microexperiencias de transformación social.
