17 marzo 2025 | Nesta segunda sesión da formación impartida a profesorado no marco de O Globo, alén de realizar un pequeno repaso do acontecido na sesión previa, puidemos afondar no estado do desenvolvemento  das microexperiencias de transformación social en cada un dos centros participantes do proxecto.  Ademais, houbo tempo para presentar novas ferramentas de traballo que lles permitan seguir contando con recursos de Educación para a Cidadanía Global. 

Así, de xeito colectivo, alimentámonos de ideas e inspirámonos mutuamente para seguir avanzando nas propostas.

O dereito á paz e a non-violencia, o xenocidio en Palestina, a macrocelulosa de Altri, a sociedade adultocentrista, a radio e os ODS, e a problemática do ruído foron algúns dos temas sobre os que aterran estas microexperiencias.

Nos vindeiros meses continuamos cun acompañamento máis persoalizado ao profesorado, onde a equipa de O Globo ofrecemos orientación ante as dúbidas que poidan xurdir durante a súa posta en práctica.

Mentres alumnado e profesorado continúan cambiando o mundo dende as súas aulas, desde O Globo imos pouco a pouco poñendo o foco no noso VII Encontro, onde volveremos a atoparnos e a compartir aprendizaxes.