Voluntariado para combater a discriminación
Mozos e mozas participantes da Asociación Down Lugo, no marco do proxecto “Promovendo Liderados Xuvenís Transformadores” de Solidariedade Internacional de Galicia, reflexionaron sobre a participación social e sobre aquelas problemáticas que máis lles preocupan da sociedade actual.
A discriminación foi identificada como unha realidade que afecta a moitas persoas e colectivos vulnerables. A través de distintas dinámicas, analizaron as causas e consecuencias e, como resposta, decidiron realizar accións de voluntariado comunitario con infancia vulnerable e persoas maiores.
Pode a participación transformar o mundo no que vivimos?
Nesta fase reflexionamos sobre a participación e sobre aquelas situacións da sociedade que máis nos preocupan. A través do diálogo, das nosas experiencias persoais e da visualización de curtametraxes e vídeos, identificamos a discriminación como unha problemática que afecta a milleiros de persoas en todo o mundo.
Como persoas con discapacidade intelectual, analizamos tamén como esta realidade nos afecta directamente no día a día, limitando en ocasións a nosa participación plena na sociedade. Ademais, reflexionamos sobre que a discriminación tamén afecta a outros colectivos vulnerables por diversos motivos: xénero, orixe, diversidade cultural, orientación sexual, situación económica...
Esta reflexión colectiva permitiunos comprender como unha problemática presente no noso contorno máis próximo está tamén conectada cunha realidade global.
Curta "No juegues conmigo" Curta "Lo incorrecto" PreocupaciónsA discriminación: unha realidade con moitas causas
Nesta fase afondamos na problemática da discriminación a través de debates e reflexións colectivas arredor das curtametraxes visualizadas. Compartimos opinións, experiencias e puntos de vista sobre as diferentes formas de discriminación que existen na sociedade e sobre como afectan á vida das persoas.
Ademais, realizamos unha dinámica de “árbore de problemas” na que identificamos as principais causas e consecuencias da discriminación, partindo de toda a investigación previa realizada durante o proxecto. Esta actividade permitiunos comprender que a discriminación non aparece de maneira illada, senón que está relacionada con prexuízos, desigualdades e barreiras sociais que limitan a participación e os dereitos de moitas persoas.
Tamén foi un momento para imaxinar o futuro que queremos construír: unha sociedade máis xusta e inclusiva, onde todas as persoas sexan tratadas con respecto, teñan os mesmos dereitos e poidan participar en igualdade de condicións, independentemente das súas características persoais.
Facemos voluntariado por unha sociedade máis inclusiva
Como resposta á problemática traballada, decidimos desenvolver diferentes accións de voluntariado comunitario. A través desta iniciativa, dedicamos o noso tempo e participación a colaborar de maneira activa con persoas e colectivos do nosa contorna.
As accións céntranse especialmente en dous colectivos vulnerables que poden sufrir situacións de discriminación ou exclusión social: a infancia e as persoas maiores. Da man de dúas entidades locais, establecemos alianzas para participar en actividades relacionadas co acompañamento para combater a soidade, a participación en espazos de ocio alternativo e o desenvolvemento de dinámicas que favorecen o benestar e a psicomotricidade.
Con esta acción non só buscamos contribuír a mellorar a calidade de vida das persoas coas que colaboramos, senón tamén reivindicar o papel activo das persoas con discapacidade intelectual na sociedade. A través do voluntariado demostramos que todas as persoas podemos participar, implicarnos e contribuír a unha sociedade máis xusta e inclusiva.
Dossier fotográfico